Author: Ms. Reaksa Pin, Research Lead, TYS Cambodia
Media Coordinator: Mr. Bun Vattana HENG, Media and Digital Communications Officer, TYS Cambodia
លោក លី សៀនលុង នឹងចុះចេញពីតំណែងជានាយករដ្ឋមន្ត្រីសិង្ហបុរីនៅខែឧសភា
ក្រោយពីកាន់តំណែងជានាយករដ្ឋមន្ត្រីនៃប្រទេសសិង្ហបុរីអស់រយៈពេល ២០ឆ្នាំ កន្លងមក លោក លី សៀនលុង (Lee Hsien Long) នឹងលាលែងចុះចេញជាស្ថាពរនៅ ថ្ងៃទី១៥ ខែឧសភា ខាងមុខនេះ ដើម្បីត្រួសត្រាយបេីកផ្លូវសម្រាប់មេដឹកនាំជំនាន់ទី៤ ឬ “៤ជ” នៃគណបក្សកាន់អំណាច «សកម្មភាពប្រជាជន» (PAP) ឡេីងមកបន្តវេន។ កាលពី ថ្ងៃច័ន្ទ លោកនាយករដ្ឋមន្ត្រី បានប្រកាសជាសាធារណៈថា លោកឧបនាយករដ្ឋមន្ត្រី ឡូរ៉ែន វង្ស (Lawrence Wong) ដែលជារដ្ឋមន្ត្រីក្រសួងហិរញ្ញវត្ថុ និងជាសហប្រធាន នៃក្រុមការងារពហុក្រសួងឆ្លើយតបនឹងជំងឺរាតត្បាតកូវីដ១៩ របស់ប្រទេសសិង្ហបុរី ត្រូវទទួលបានការគាំទ្រជ្រេីសតាំងជានាយករដ្ឋមន្ត្រីថ្មីបន្តអាណត្តិរបស់លោក ហើយនឹងដឹកនាំគណបក្ស PAP ឆ្ពោះទៅកាន់ការបោះឆ្នោតសកល នាខែវិច្ឆិកា ឆ្នាំ២០២៥។
ប្រមុខការទូតកំពូលចិន លោក វ៉ាង យី នឹងជំរុញ គំនិតផ្តួចផ្តើមខ្សែក្រវ៉ាត់ និងផ្លូវ (BRI) ក្នុងអំឡុងពេលមកបំពេញទស្សនកិច្ចនៅប្រទេសឥណ្ឌូនេស៊ី កម្ពុជា និងប៉ាពួញ៉ូហ្គីណេ
កាលពីថ្ងៃ អង្គារ ក្រសួងការបរទេសចិនបានអោយដឹងថា ចាប់ពីថ្ងៃទី១៨ ដល់ថ្ងៃទី២៣ ខែមេសា លោក វ៉ាង យី (Wang Yi) រដ្ឋមន្ត្រីការបរទេសចិន នឹងមកបំពេញទស្សនកិច្ចរយៈពេលប្រាំមួយថ្ងៃ នៅប្រទេសឥណ្ឌូនេស៊ី កម្ពុជា និងប៉ាពួញ៉ូហ្គីណេ ដេីម្បីចូលរួមកិច្ចប្រជុំកម្រិតខ្ពស់ ជម្រុញដល់ការបង្កើនទំនាក់ទំនងការទូតនៃ គំនិតផ្តួចផ្តើមខ្សែក្រវ៉ាត់ និងផ្លូវ (BRI) ចំពេលកំពុងមានការប្រកួតប្រជែងជាយុទ្ធសាស្ត្រក្នុងតំបន់កាន់តែខ្លាំងឡេីង ជាមួយសហរដ្ឋអាមេរិក។ ប្រទេសគោលដៅទាំងបី ត្រូវបានលើកឡើងថា ជា “មិត្តល្អ និងដៃគូល្អ” របស់ចិន ដែលពួកគេមានចិនជាចំណោមដៃគូពាណិជ្ជកម្ម និង ជាប្រភពនៃលំហូរវិនិយោគទុនបរទេសដ៏ធំចម្បង។ បច្ចុប្បន្ននេះ ស្ថានភាពទំនាក់ទំនង ចិន-ឥណ្ឌូណេស៊ី និងកម្ពុជា-ចិន គឺស្ថិតក្នុងកម្រិតខ្ពស់លំដាប់នៃការកសាង “សហគមន៍នៃជោគវាសនារួម” ចំណែកឯទំនាក់ទំនង ចិន-ប៉ាពួញ៉ូហ្គីណេ បានឈានដល់កម្រិត “ភាពជាដៃគូយុទ្ធសាស្ត្រគ្រប់ជ្រុងជ្រោយ” ហេីយ។
ហ្វីលីពីននិយាយថា ការសម្រេចចិត្តពង្រឹងទំនាក់ទំនងជាមួយជប៉ុន និងអាមេរិកគឺជា “ជម្រើសអធិបតេយ្យភាព”
កាលពីសប្តាហ៍មុន ក្នុងកិច្ចប្រជុំកំពូលត្រីភាគី នៅរដ្ឋធានី វ៉ាស៊ីនតោន ឌីស៊ី ថ្នាក់ដឹកនាំហ្វីលីពីន សហរដ្ឋអាមេរិក និងជប៉ុនបានរួមគ្នាសម្តែងនូវសេចក្តី “ព្រួយបារម្ភយ៉ាងធ្ងន់ធ្ងរ” ចំពោះសកម្មភាពរបស់ចិន នៅសមុទ្រចិនខាងត្បូង ដែលត្រូវបានចិន ប្រឆាំងជំទាស់យ៉ាងខ្លាំងថា ជាការប្រកាន់ខ្ជាប់នូវ “ផ្នត់គំនិតសង្រ្គាមត្រជាក់” និងជា “ការបង្កើតបក្សសម្ព័ន្ធតូចៗ ដើម្បីប្រឆាំងនឹងចិន”។ ជាការឆ្លេីយតប នៅថ្ងៃព្រហស្បតិ៍្ត ក្រសួងការបរទេសហ្វីលីពីន បានចេញសេចក្តីថ្លែងការណ៍មួយ បញ្ជាក់ថា ការសម្រេចចិត្តរបស់ខ្លួនក្នុងការពង្រឹងទំនាក់ទំនងជាមួយ សហរដ្ឋអាមេរិក និងជប៉ុន គឺជា “ជម្រើសអធិបតេយ្យភាព” ដើម្បីលើកកម្ពស់សន្តិភាព និងវិបុលភាព នៅឥណ្ឌូប៉ាស៊ីហ្វិក ហើយថាប្រទេសចិនគួរតែឆ្លុះបញ្ចាំងលើ “ការទាមទារដែនសមុទ្រហួសហេតុ និងសកម្មភាពយាយីរបស់ខ្លួន។”
យោងតាមការរាយការណ៍ អតីតមេដឹកនាំមីយ៉ាន់ម៉ា លោកស្រី អ៊ុងសាន ស៊ូជី ត្រូវបានផ្លាស់ពីពន្ធនាគារទៅការឃុំខ្លួនក្នុងផ្ទះ
យោងតាមសារពត៌មាន VOA បានររាយការណ៍ឲ្យដឹងថា កាលពីថ្ងៃអង្គារ រដ្ឋាភិបាលយោធាមីយ៉ាន់ម៉ា បានផ្លាស់មេដឹកនាំលទ្ធិប្រជាធិបតេយ្យ លោកស្រី អ៊ុងសាន ស៊ូជី (Aung San Suu Kyi) អាយុ ៧៨ ឆ្នាំ និងអតីតប្រធានាធិបតីរដ្ឋាភិបាលសុីវិល លោក វីន មីយីន (Win Myint) អាយុ ៧២ ឆ្នាំ ពីពន្ធនាគារ នៅរដ្ឋធានី ណៃពីដោរ (Naypyitaw) និងទីក្រុង Taungoo ទៅកាន់ការឃុំខ្លួនក្នុងផ្ទះ។ អ្នកនាំពាក្យរដ្ឋាភិបាលបាននិយាយថា ការបំលាស់នេះគឺ ដើម្បីការពារសុខភាពវ័យចំណាស់របស់អ្នកទាំងពីរ ពីរលកកំដៅដ៏ក្តៅគគុក ដែលមានកម្រិតសីតុណ្ហភាពប្រហែល ៤០ អង្សាសេ។
—————————————————————————————————
Sup SEAkers គឺជាការប្រមូលព័ត៌មានប្រចាំសប្តាហ៍មកពីតំបន់ផ្សេងៗគ្នាដែលមានគោលបំណងផ្តល់ព័ត៌មាននិងអប់រំដល់សាធារណជនទូទៅ។ តាមដានពួកយើងរៀងរាល់ថ្ងៃអាទិត្យ ដើម្បីបន្តទទួលបានព័ត៌មានអំពីអ្វីដែលកើតឡើងនៅក្នុងតំបន់របស់យើង។ សប្តាហ៍នេះ យើងសូមលើកយកព័ត៌មានសំខាន់ៗចំនួន ៤ ដែលបានកើតឡើងក្នុងអាស៊ាន។
theyoungseakers.wordpress.com 